حامد زيد

القصيده :الثريا

ليه تطعني وانا ميت بليا
ماكفاك الي حصلّي قبل ساعه

كن بين همومي وبينك حميا
جيتكم واحد وجيتوني جماعه

انت منا والمصايب من هنيا
كلكم ضدي ترى ماهي شجاعه

ما ابشع من جروح طعنات القفيا
غير سكينٍ تصيب بهالبشاعه

لاتتوب ولاتذوب ولا تريا
جرحها جرح وفظاعتها فظاعه

ترتوي من فيض دمي والتفيا
وصار قلبي مثل اخوها بالرضاعه

وانت ليل لو ضويته مايضيّا
ضعت فيه وشفت نفسي في ضياعه

اتهيا وين ما اشوفه تهيا
وارسي بمرساه وشراعي شراعه

من عرفته والمحيا بالمحيا
ومايروح الا ذراعي في ذراعه

ان رضيت ارضيه وان عييت عيا
وان طلبني قلت له سمع وطاعه

ما عشقت من النجوم إلا ((الثريا))
وماملكت من الكنوز إلا القناعه

وانت وجيوش الموادع والجفيا
كيف اوقف ضدكم وانتم جماعه

لوبجيكم بالشجاعه والحميا
البلا ان الكثره تغلب الشجاعه

القصيده :الحلم

بوقت من البطا،وبليل تتراقص شياطينه
بعد شفت الضيا ينزع من ثياب المسا ثلثين
تحايلت المنام اللي مثل بيتك تمرينه
وانا اللي من تفارقنا وأنا ماغمضت لي عين



غريبة كل حلم يمر برقادي تزورينه
والاغرب كيف أحلم الحلم،وارجع واحلمه بعدين؟



قبل يومين،شفتك بالمنام..وقمت من حينه!
ونمت أمس،ورجع نفس المنام اللي قبل يومين



أنا اللي قبل اسافر شلت قلبي من شرايينه
تركته في يدك مثل الأمانه ،واحفظيها زين



ترى حفظ الأمانه دين..مجبورة تردينه
أجل ، مافيه أحد كد قال لك(حفظ الأمانة دين)؟!



مرد المقفي بيلفي.. ويستوفي ،وتوفينه
بعد ليله ،ثلاثه،أربعه،عشره،شهر، شهرين



إذا انتي ،ماانتي بقد الكلام اللي تقولينه
حرام..استامنك حاجة،وإذا جيت اطلبك تنسين



تخونين،وتبين أرضى.!وأحد يرضى تخونينه!
أنا لاجيت أخونك، مع حبيبة ثانيه،ترضين.؟



من أول مارجعت من السفر ماشفت لك بينه؟
وأنا اللي كنت أحسبك قبل ادوس ارض المطار..تجين



تكونين أنتي أول شخص عيني تحتضن عينه
وكنت أتخيلك من زود فرحة رجعتي..تبكين



وأشوف بدمعتك حكيك..وأعرفه قبل تحكينه
واجيب أحلى من اللي بتحكينه،وأتركك تحكين



تقولين:الوطن نور..وأقول بنورمضوينه
تقولي لي:غديت أحلى،وأقول:عيونك الحلوين



كلام نام بشفاهك..وخفتي لاتصحينه
ذخرتيه لغرام للي ينام...ويترك تصحين



تغانمتي غيابي..لين رجحتي موازينه
تعلم من يدك لمس الكفوف وعلمك تجفين



وليتك لاقيه به شي..فيني ماتلاقينه!
مهو بغرور..لكن خابرك مالك أمل تلقين



تغافلك بغلا..والإ الحلا مهو بمن زينه!!
تزينه الصور ..بس الصحيح ابن الحلال زوين



وأنا ماني بنقاص عنه يوم أنك تبدينه
نصيبي..هو نصيبي لو يسددها من الصوبين



قنوع بمظهري ،والسم مايذبح ثعابينه
على قول المثل ماني حلو..لكني ماني شين



إذا أهداك الزهر مره،فأنا اهديتك بساتينه
وإذا ألهاك بفرح ليله، فانا تهت لبكاك سنين



وإذا استضعفتك أملاكه...وشتتك ملايينه
أنا حتى فتات الخبزة أقسمها معك نصين




طموحي ،بس أجي وأظفر بشي تستحقينه
تدينته ،تسلفته،سرقته ،مومهم منين؟



كأني من كثر ماارضى بكل اللي تمنينه
لو انك تطلبين الله ..يعنيني، بقول آمين



أنا ماالعب على الحبلين،وقت الطيش وسنينه
تبين الحين يوم أني كبرت العب على الحبلين؟



ترى عند البدو بالذات عيب اللي تسوينه
حلاتك لاعشقتي..تعشقيني ليوم الدين



غرامٍ نسكن ضلوعه..حشيمه من مجانينه
جفا،يجمع معزتنا...ولاعشق يذل أثنين



كثار اللي تحدوني وقالولي :تحبينه
امانه ...لاتخليني صغير بعينهم تكفين






لاني كل ماقالوا(تخون)..اقول:مسكينه
عليك الله وأمانه..علميهم منهو المسكين



أنا خايف لياطاح الجمل تكثر سكاكينه
وأنا ماعاد بضلوعي مكان لطعنة السكين



مثل ماقالواالمكتوب واضح من عناوينه
لو ارحل منك للغربه بسافر من ظلامك وين؟




كفايه..كل حلم يمر برقادي تزورينه
كفاية..من تفارقنا..وأنا ماغمضت لي عين



قبل يومين شفتك بالمنام وقمت من حينه
ونمت أمس،ورجع نفس المنام اللي قبل يومين

القصيده :الاسطوره

ماتقبلت الفراق ما ليدي فيه حيله
آه لو ان الظروف المقبله تكشف قدرها



لو يعرف الشخص منّا وش مع الغيب ابيجي له
كان جنبنا المشاكل من قبل يوقع ضررها



ما هقيت الليله اللي جابت الفرقا طويله
لين صارت ليلة امس بعيني اطول من شهرها



والعذاب اللي يذوب بعين من يفقد خليله
عندي اكبر من عذاب العين لو تفقد نظرها



والحبيب اللي صدوده مثل مداته جزيله
صد عني واعرفه لو صد عن حاجه هجرها



كن روحي يوم حست في جفاه وصعب نيله
بشرتني بالضياع وشدة العزم لسفرها



ما رحمها من هلاك وما تقبّلها دخيله
تحتضر قدام عينه لين ماتت من قهرها



عاد ليت اللي ذبحها وارهب الموت بوسيله
ما دفن وجه الضحيه والسكاكين بنحرها



ليت قلبه يوم سوى فعلته كمّل جميله
لو غسلها من عروقه وبكفن صدره قبرها



من حفر بضلوع قلبه حفرةٍ تكفي قتيله
ليه ما يدفن قتيله بالضلوع اللي حفرها؟



اشتكيته للرفوف وللبراويز الهزيله
وانذعرت من النياح اللي سمعته في صورها



رحت اسولف للجبال الصم عن قصة رحيله
ما تركت متونها الا ينحت الدمع بصخرها



واحدٍ حقق جماله كذب اساطير الف ليله
يسكن السبع البحور ويحبس الحور بدررها



الدروب بكبرياها ترتجف تحته ذليله
والورود اللي تقبّل خطوته تنبت بأثرها



والغصون اليا بغاها تنثني له.تنثني له
والفياض ان حب ينثر عطرها يلمس زهرها



لو يصوّت للغدير المنجرف جفف سبيله
وان تبسّم للجبال الصامته نطّق حجرها



كل حاجه تستوي له. لي بغاها تستوي له
بالنظر واستغفر الله لو بقول : انه سحرها



ذاك لو بس يتمنا فاكهة شجرة ضليله
بس يفتح راحت ايده ويتساقط له ثمرها !



كن ربي سخر له المعجزات المستحيله
واصبح اسطوره وكل الالسنه تنقل خبرها



هان محجر دمع عيني لين جفّف سلسبيله
والتفت لأخير دمعه قبّلت يده ونثرها



دمعةٍ كن بشقاها يوم طاحت في شليله
جادلٍ جات بدويٍ تطلب الستر وسترها



له علي انه ليا من طاح من عيني تشيله
ولي عليه انه يرجّع لابتساماتي ثغرها



لو طعوني بالسكاكين بيده تشفي غليله
لاشتريها من عذابي وادفع بدمي مهرها



واطلبه ينهال فيني طعن لين يطيح حيله
بس لا يترك عيوني تنحرم نعمة بصرها



له بعيني مثل ما للطهر بالنفس الاصيله
تقطع يدين الردا لو مس شعره من شعرها



مابغيته غير دربٍ شتّت اقدام الدليله
مزنةٍ ما بللتني واستحيت اطلب مطرها



والعطايا من يدين الخلق للطالب قليله
والوهايب من يد الله للعباد اجل وأرها



وان نسيت اني زرعت العشق وحظوظي بخيله
ما نسيت ان العطايا تستحق اللي شكرها



صعب تلقى شخص وافي يجزي الطيب بمثيله
والعرب كد قالت ان : الناس ما تترك قشرها

القصيده :السفينة

ضاقت وساع الفيافي والوعد متن السفينه
للطريق اللي دعاني بعد أمان الله وأمانه



لاتناديني وصوني قلبك الله لايهينه
لايراهن في رجوعي لجل مايخسر رهانه



ليه ما أرحل عن غرامك بعد ماذقت الغبينه
أذكريلي شي واحد يستحق أقعد عشانه



قلب ماحن لوصالي ماني بحاجة حنينه
وأشهد أنه مايعزر بالرفيع الا هوانه



الهوى الغدار حد الله مابيني وبينه
والرجل لاخير فيه إن ماحفظ قدره وصانه



واحدٍ مثلي اليا من حدته عوجا سنينه
ماشكى لقرب أبن ادم لوهو أقرب من أخوانه



يوم قلبي ماعصاك وماقدرتي تذبحينه
ليه خنتي فيه وأنتي معه من نفس الديانه



كان ذبحي بيدك أرحملي من اللي تفعلينه
وأن طلبتك تذبحيني ماذبحتيني لعانه



كل جرحٍ من جروحي تذكرينه .. تنكرينه
كن مالك في نزيفه (يد) خانت بالأمانه



ينزف الخافق تواضع لين لطختي جبينه
والا أنا ماكنت أبيها توصل لحد الأهانه



قلت من باب الميانه صاحبك وتعذبينه
لعنبوك إرخي معاي أشوي ماصارت ميانه



طعت عقلك يوم قيل إن العقل للبنت زينه
لكن الشرهه علي اللي كنت أحسب إنك تكانه



من بعد ماكنتي أنتي في حشاي أغلى سجينه
بوعدك بطلق سراحك وأتهميني بالأدانه



وين رايح..؟ لأي دربٍ مايرجع للمدينه
ليه رايح..؟ لان قلبك ماترك قلبي وشانه



كيف أبنسى.؟ ربي اللي ملهم القلب السكينه
مثل ماعانه بقربك لانوى فرقاك عانه



كان قاسي يجرح أطراف السكاكين السنينه
مايطيح وبنتٍ مثلك حبها هزت كيانه



والا أنا خابر خفوقي مايمد الا الثمينه
وإن بغى يغيض الثريا قعد القمرى وزانه



مزعلٍ لجلك هنوفٍ رجت عقول رزينه
وإن تهادت بالطريق الجرهدي تزهر جنانه



جادلٍ كن الجمال قبالها كتف يدينه
والقمر لو شاورت له ينزح وتقعد مكانه



كانت أول من تحكم في فروع الياسمينه
وأن تعدتهن تثنن خيزرانه .. خيزرانه



بعتها لجلك وصارت لأصغر أطرافك رهينه
وألا هي لفتة هدبها تغمرك ثقل ورزانه



والخفوق اللي تغذى من معزة والدينه
مشكلته إنه تعلق في زمن ماهو زمانه



كل مازادت جراحه وأكتشف غلطة ضنينه
صدقيه أن قال مابه شخص يستاهل حنانه



يوم نادا يافلانه مارضيتي تسمعينه
لين صوت يافلانه ,يافلانه ,يافلانه



كنت أشوفك زعفرانه تقرض الورد وتدينه
يمكن أني ماقطفتك بس أشوفك زعفرانه



كنت أهاب البعد عنك وأطلبك لاتذكرينه
كان خوف من الفراق وخطوت الفرقا جبانه



وماقتنعت أن الخيانه للرجل تلوي يمينه
لين ماربي بعثك وذقت من طعم الخيانه



إسمحيلي..مابقى فيني مكانٍ تطعنينه
وأقبلي من جوف قلبي كل عطفه وأمتنانه



والله الله في عذابك بتركك عينك بعينه
دلليه ولايرده عن شقاك إلا لسانه



والا أنا قررت أسافر وأمتطي ظهر السفينه
لأن مابه شي واحد يستحق أقعد عشانه

القصيده :أربع خناجر

مشكله لا جات حاجتك بيدين البخيل
مايفكك لين تدفع كثر مايدفعه



ومشكله لا صرت مطعون بكفوف الدخيل
في ظهرك اربع خناجر وبالصدر اربعه



ومشكله لا ضاق بالوقت رجالً ثقيل
يطلب احبابه وعيا زمانه ينفعه



ليت ربي مايحاسب خليلً من خليل
دام مال الحظ فزعه وللوجه اقنعه



ودام مال العذل تالي ومابالحيل حيل
الغلا سماً نذوقه ومرً نجرعه



نحتري فيه القا والحصيل هو الحصيل
مثل حلماً ماتحقق وعيت اقطعه



كني اللي حط بشفاه من جمر المليل
لا قدر يرميه للناس وزرا يبلعه



والظروف اللي حدتني لنيران وفتيل
عرضت دمع المحاجر لشيً يجزعه



والمدامع بالغلا لا تحال ولا تحيل
والمشاكل كل ماجات جات مجمعه



اعذلوني عن هوى النفس وعيوني تخيل
في حبيب ٍ ماتركته ولازلت اتبعه



مغرم في حب مثله ولا ارضى له بديل
عيني تشوفه وقلبي يجوع ويشبعه



ذاك كل مازان بالي وطالعت النخيل
ماذكرت الا ثباته بوقت الزعزعه



ماهو الاقطعة من حشا قلباً عليل
وماني الا قطعة منه مخلوقً معه



لا جميل شفت قبله ولا بعده جميل
العذارا رهن رمشه وانا رهن اصبعه



والله انه لو طلبني اطلوع المستحيل
لا اطلعه مني مناك يعني لا اطلعه



ماعلي من الملامه وهرج الهبيل
مشجع الرجال لا ثار غيره مشجعه



في عيون اللي عشقني ولا جاني هزيل
الله اللي حط عشقه بقلبي وزرعه



لو سكت ينطق له الصم والدنيا تسيل
وان حكى لو يمشي المزن ياقف يسمعه



سلسبيل من شفاته يخالط سلسبيل
معمعه بسكات واحلا سكات بمعمعه



ماهقيت ان اكثر الليل يمرح بالجديل
لين شفته شوف عيني بكفه يرفعه



وان حيت ومابقالي معه ياكود ليل
لا اسهره بأول غروبه وموت بمطلعه



والله ان العشق جمره وطاحت بالشليل
وان حصل ماطاعك الوقت بحبابك طعه



من هو اللي علم عداي نكران الجميل
ومن هو اللي خان خلي وحاول يقنعه



كل عاذل ردني عنك يالطرف الكحيل
ياعسى الله يقلعه ياعسى الله يقلعه



يامعرض قلب الاحباب للدرب الطويل
السعه لا بارك الله بالضيق السعه



والله ان الوقت قاسي وانا ماني ذليل
واشهد ان الرجل مرات ظنه يخدعه



وانتم اتعذلون خفاق بعيون العديل
مارحمتم نار جرحه وحيرة مدمعه



والسوالف ليلها ليل والحايل يحيل
والمشاكل مشكله بمشكله متجمعه



مشكله لا خانك الوقت بالحمل الثقيل
لو زرعت الزرع هوج العواصف يشلعه



ومشكله لاصار عاذلك مايبرد غليل
لا ترده طيب كلمه ولحدً يمنعه



ومشكله لا صرت مطعون بكفوف الدخيل
في ظهرك اربع خناجر وبالصدر اربعه

القصيده :ادلعها وولعها

بعد ماقابلتني عاتبوها
على شوف الحبايب حاسبوها



خذوها وأبعدوها غصب عني
وعن وجهة طريقي جنّبوها



وشالوها عن عيوني غصيبه
عواذل وأغصبوني وأغصبوها



خذوها من يديني شوف عيني
وعن عيني تعدّوا وأحجبوها



كلام وصدّقوا بالبنت كذبه
وهم اللي من أول كذّبوها



وهم وشدخلهم في مال بيّن
لبوها والخلايق طالبوها



وفيّه لاتخون ولاتعاند
جسوره والمواعيد أرعبوها



ملاكٍ كامله والكامل الله
ولكن العواذل عذربوها



وهي كلما دعتني تشتكي لي
عن اللي سالفتنا سرّبوها



تخاف وتلتفت مع كل كلمه
تظن أن العواذل راقبوها



تلفّت من عقب ماهي جريئه
شجاعه ماتهاب وهيّبوها



وأهدّيها وأنا حاير وثاير
مصيبه ياعذابٍ عذبوها



وهم كلما خذوها عن طريقي
تراهم صوب قلبي قرّبوها



وأنا ماتعّبت قلبي خيانه
خيانه رتّبوها وأحسبوها



ولا يعجز خفوقي لايقابل
جفا من حاربوه وحاربوها



وأنا لي عزّة ٍ تفرض عليّه
أخاطب بالجفا من خاطبوها



وأكسر لوحة الماضي وأزيله
وأخرّبها مثل ماخرّبوها



وأذوّقهم ندم ماصار فيها
وأشرّبهم من اللي شرّبوها



وأدلّعها وأولّعها بنفسي
وأشرٌّقها بعد ماغرّبوها



وأعوّضها عن اللي راح كله
وعن ذيك الليالي كلّبوها



غلاها بالحشى لازال ثابت
ولو حتى بغيري حبّبوها



وغلاي بقلبها مرّ وتعدى
غلاها لأمها ولا لأبوها

القصيده :الاولى والتالي

جا نهار ما رحمتني جيته وقدومه
شفت فيه الناس واجد واقفين اقبالي



كنت احسب انها حقيقة والعرب ملمومه
وقمت افضفض عن همومي واشتكي غربالي



ويوم زال الحزن عني وانجلا بغيومه
واثرني ما غير اسولف بالخلا بلحالي



من عذابي قمت اعزي قصة مرحومة
ولعت بيدين خلي وانطفت بهمالي



قصةٍ لدت عيون صويحبي من نومه
يوم شلت الموت بيدي وابتلوا عذالي



ما رضيت اكسر غلاي وما قدرت ارومه
وعاذلي ما صد عني وما قوى منزالي



إبتليته لين جتني خنجر مسمومة
وابتلاني لين جاب الاولى والتالي



والله انه ما عذلني لين شق هدومه
ولين خانتني عزومي وانكسر تمثالي



والا انا ما كنت ابين لا أمطرت ديمومة
بالمدامع من فراق المخلصين امثالي



كنت اوقف واتذكر نفخة اليشمومة
واذكر اني كنت غالي في عيون الغالي



واحد كانت نسايم سيرته بسمومه
وكان كل ما شاف ظلمي بالهوى يلجالي



ذاك والله كل ما أرسل في حشاي سهومه
انتهى ليل السكينة وأبتدا زالزالي



ووالله اني كل ما اسمع سيرته وعلومه
قمت اشوف الموت الاحمر واقف بظلالي



واشهد اني كل ما اسهى وافتكر برسومه
وما وعيت الا وانا ارمي غترتي وعقالي



ليت ربي يحتميه ويحرسه ويدومه
يومه اقرب من عروقي للجسد بوصالي



وليتني لما عرفته ما عرفت خصومه
وما وقعت بظلم ناس ماوراهم والي



العذول اللي حرمني حاجة مقسومة
ليه يحرمني قهوتي(والدلال دلالي)؟



وليه يسأل في غرامي وان بغيت اسومه؟
دام صار الجيب جيبي والريال اريالي



والله ان العشق شي يستحق القومة
واشهد ان عيون خلي تستحق افعالي



يكفي انه لا نظرلي نظرة محشومة
يرتجف كفي ويوقع من يدي فنجالي



وان لمحت بطرف عينه دمعة مكتومة
جيت كلي من عذابي عالي متعالي



وان تبوسم لي بعينه والشفا مضمومة
والله ان مدري وش اللي بعدها يجرالي




ليت يومي قبل يومه أو معاه بيومه
وليت حاله غير حالي دام هذا حالي



إن غفيت الليل جتني بالمنام حلومه
وان صحيت الصبح ناسي سيرته يطرالي



والله ليبطي وعيني تسهره وتقومه
والله ليبطي عذولي ما يفك حبالي



دامني لا زلت احبه واعشقه بهمومه
بذكره مع كل خطوة حللت ترحالي



بذكره مع كل ليلة مظلمة مشؤومة
نزلتني في حشاه ورفعت منزالي



وبذكره مع كل دمعة نوخت بكمومه
وعلمتني بان قدري في غرامه عالي



وبذكره مع كل نظره بائسة مظلومة
حسستني بانه اخر من نوى يصفالي



وبذكره كا ما نسيته وان ذكرت سلومه
قمت اشوف الناس واجد واقفين قبالي



وان حسبت انها حقيقه والعرب ملمومة
ما تحكمت بسكوتي لين طال جدالي



ويوم زال الحزن عني وانجلا بغيومه
واثرني لا زلت اسولف بالخلا بالحالي

مشكووووووور

مشكورررررررررررررررررر

والله انت بداعة مثل حامد زيد

مشكوررررررررر يا غالي