حامد زيد

السلام عليكم ورحمة الله وبركاته
وتراقصت الكلمات بين يدي الشاعر حامد زيد
فأبدع في مجال الشعر النبطي
حتى وصل القمة
واشتهر لحد اللامعقول
فأحببت أن أضيف قصائد الشاعر بين يديك لتقرأوها
آملا الاستمتاع فيما نصه الشاعر

القصيده :انتي ولا شيّ

والله وصرتي تستهينين فيني

وانا الذي سويت لك قدر بيديّ

تدرين وش كنتي قبل تعرفيني ؟

ان قلت لك كنتي ولا حاجة شويّ

انا الذي فرشت لك رمش عيني

وعملت منك شي وانتي ولا شيّ

جيت اعشقك ما جيتك لك تحقريني

جيت اسكنك بسمة ما هو بسكنك غيّ

لا صرت عامل لك قدر قدريني

ترا الكرامة صفحة ما لها طيّ

ما دام ما جيتي غلا لا تجيني

نار الجفا عندي ولا الذل بالفيّ

والله لاهجرك قبل لا تهجريني

اجل تبيعيني واجيلك برجليّ

يا تتركين الكبر يا تتركيني

لأن المحبة شي والمهزله شيّ

إن كانت الدعوة غلاي وحنيني

يمكن يزول الحقد ويشعشع الضيّ

لكن حكاية ينحني لك جبيني

في ذمتي ما ينحني لك وانا حيّ

القصيده :أهل الجنوب

وعيني اللي كل ما ذعذع من الغرب هبوب

يحلا لها لون الغروب اللي يذوب قبالها

ويا ويل حالي كل ما يحلالها لون الغروب

تطري لي الريم اللعوب وسالفة ترحالها

وعز الله اني كل ما تطري لي الريم اللعوب

حرمت امد ايدي على حاجة وانا ما اقوالها

من سافرت ريم الفلا صديت عن كل الدروب

ما هو قصور بالعذارى بس ذيك لحالها

من فارقتني ما خطف قلبي من الحور محبوب

ولا لقيت الجادل اللي تستحق احيالها

لأن القلوب ان ما وفت لأحبابها ما هي قلوب

والعشره اللي ما ترد الروح ما نسعى لها

إما الوفى اللي يستر الرجّال من كل العيوب

والا الجفى اللي يستر عيوب العرب في رجالها

ما اقسى من فراق الجنوب الا فراق اهل الجنوب

ويلي على اللي كل ما تزعل تشد رحالها

اللي مذيره العتب لا شبت بصدري شبوب

عييت اراضيها وهي عيت تطول بالها

كانت معي مثل النصيب يحدني من كل صوب

كانت دروبي من متاهات الظلل لظلالها

كانت هروبي لا شعرت اني بحاجه للهروب

كانت سماي اللي ليا ضاقت علي ألجالها

ليه اتحداني وانا في كل الاحوال مغلوب

ليه حرمتني من قهر عذالي وعذالها

ليه اتجاهلني وانا لاني جبان ولا كذوب

ليه ارخصت دمعي وانا اللي ما بكيت الا لها

ما ترحم اللي له سنه كأنه على النار محطوب

ما هزها دمع الفقيد اللي بكته أطلالها

ما خافت تهدم السنين اللي بنتنا طوب..طوب

ما فكرت تشفق على حالي وترحم حالها

قولوا لها لو ما تذوب انا بخليها تذوب

قولوا لها لو ما عنت لي مستعد اعنالها

إليا ادمحت لي هالخطا بدمح لها كل الذنوب

وإن جابت الحسنى معي تبشر بعشر أمثالها

أفرش لها صدري وطن وأجمع لها ضلوعي شعوب

وأرقى لها المكانه اللي ما حد(ن) يرقى لها

إن كاني مخطي فأنا ماني خليّ من العيوب

الذنب يغفر والبشر تجزى بقدر أعمالها

البعد قاسي والفراق يضيق الصدر الرحوب

وانا تعبت ادور الحيله وارد احتالها

قولولها ترجع ترا ماني على الحزن مغصوب

وإلا ترا نذر(ن) علي انه ماهو ب أشوالها

إما تجنب هالهبال وتترك البعد وتتوب

والا بتبشر بالهبال اللي ما هو بهبالها

كافي زعل ترا الظروف مقفله من كل صوب

وأنا حملت من الهموم انواعها واشكالها

يكفيني اني كل ما هبت على صدري هبوب

تحن عيني للجنوب وتلتفت بلحالها

والمشكلة اني كل ما حنت عيوني للجنوب

تطري لي الريم اللعوب وسالفة ترحالها

وعز الله اني كل ما تطري لي الريم اللعوب

حرمت امد ايدي على حاجة وانا ما اقوالها

القصيده :قرم وفقير

منك العذر وعلي المعذره

لا تحسب حساب هجر ولا هجير

كل ذنب بتذنبه بستغفره

واحد(ن) ما يعذرك ما فيه خير

دور بصدري وطن واستعمره

عندك من الضلع الأول للأخير

عيش فيني وادمر اللي تدمره

واعتذرلي واعتبر سرك ف بير

لا تبشرني بجرح وتذخره

لا تعشمني بفرح وتستخير

ولا تنومني بليل وتسهره

ولا تنام الا وانا جفني سهير

خلني مثل النجوم مبعثره

عيش فيني لا شهيق ولا زفير

لا تقول العفو عند المقدره

خل قلبك صلب وحسابك عسير

المسامح والزعل للمبزره

والا انا لاني زعول ولا صغير

ودي ادري ليه للحزن ثمره

ودي اقطف من قساوتك العبير

ودي اجفل من فراقك واحذره

ودي اعرف لو زعلت شيب يصير

لو تقدر خاطري صدق اكسره

لو صحيح تحبني لا تستشير

ازرع بقلبي سبب يستنفره

اثبت انك غير وان الناس غير

شاعرك ما كل بنت تجرجره

حارت ابه عقول ناس(ن) ما تحير

النسا ما حركوا فيه شعره

ثار عشق وما لقى شي يثير

لو سكت شفت الوقار بمنبره

وان تكلم زمهرير بزمهرير

ما يحضر إلا القلوب مجمهره

وما يغيب الا وعشاقه كثير

إن هجرته تستقر بمحجره

وإن تبعت رضاه ما عينت خير

إعشقه لكن بعد ما تقهره

إبتسم له بس لا شفته كسير

حن لكن حن لا جبت خبره

حب لكن خل حبك بالاخير

لو عطيته وجهك أعطاك ظهره

صد عنه ويتبعك مثل الضرير

لا تحاول تكسبه ما تخسره

صير ثلج يصير لك مثل السعير

ما تميل الا الغصون المثمره

وما يسيل من الجروح الا الغزير

من قبل ما تنقهر منه اقهره

قبل لا يستحقرك خلك حقير

اسكنه حرك جموده بعثره

اعشق اكره عاتب اشره حن غير

انثره لملمه.. لملمه انثره

صد.. ياخي طير لو تقدر تطير

من متى وانا اتحرى لي مره

تثبت اني لا وقعت اوقع كبير

ابك انا مقطوع من غصن شجره

لا صديق ولا رفيق ولا عشير

بدوي(ن) شيب الصبر شعره

ما عرف ريش النعام ولا الحرير

إن غفا كأن السحاب يدثره

وإن صحى يفرش من الرمضا حصير

ماخذ(ن) من قسوة البيد أكثره

ومن شموخ البدو شر(ن) مستطير

جنته صحراه والشوك زهره

والسراب بنظرته مثل الغدير

إن فزع يا مشجعه يا مظفره

من خلقه الله وهو قرم وفقير

كان ما تقدره قل ما تقدره

صير غالي صدق والا لا تصير

الغلا اللي ما تزعزعه اهجره

دام قلبك لا يجار ولا يجير

شوف لك رجل(ن) بليد استحقره

واجد اللي يعشقون بلا ضمير

بس انا لو جبت لي مية مره

ما تحرك فيّ شعره لو تطير

القصيده :ماتشوف شر (مقتطفات)

لاباس أنا يالغاليه قلتها لك
من قلب يخلص لك يحبك ويغليك
ياليتني كنت المنوّم بدالك
وليت المرض يابنت فيني ولا فيك

القصيده :الكذب خيبة (مقتطفات)

روحي وهالمرّه خلاص لاتردين
هذا الفراق وروحةٍ دون رده
الكذب خيبه ماعرفتي تحبين
ما أنتي من يستحق المودّه
ماتعرفين الحب والعطف واللّين
ولا عاد في قلبي على الحب شده

القصيده :صوت الفناجيل (مقتطفات)

ياحبيبي لاتواعد مواعيد وتغيب
دامك تقول المواعيد من غير شهوه
والله إني من عرفتك وسميتك حبيب
أسمع بصوت الفناجيل وماشفت قهوه

لقصيده :أربع جهات (مقتطفات)

يالحبيبه خفوقي مايبيك ويبيك
أشهد أنك حبيبه غير كل البنات
وين ما ألد وجهي بالطريق التقيك
صرت أخيلك واشوفك في جميع الجهات

القصيده :ملعون ابو العشق (مقتطفات)

ملعون أبو العشق دام العشق دلّعها
لاصارت البنت تامرنا وتنهينا
تجزم على الراي والكلمه وتقطعها
وحنا الرياجيل لارحنا ولا جينا

القصيده :لولا العقل (مقتطفات)

إستحيت ورحت بالخطوه وراي
يوم شفته من بعيد يكلّمك
والله إن لولا العقل توّه معاي
كنت أعرف أعلّمه وأعلّمك

القصيده :تزعلين وتقعدين

عافت الشمس المدينة وأعلنت وقت الزوال
رغبةٍ للنوم منها مع عيون الناعسين

أبعدت من يوم شافت بالسما ضيّ الهلال
كنّها كانت تهزّا بالهلال وتستهين

كفكفت صبح التلاقي من ورا روس الجبال
واستخارتني وراحت وابعدت عن كل عين

وانتي أخطيتي خطاها وانعزلتي بالوصال
ولا رحلتي من سكات ولا وعدتيني تجين

عشت عمري بالمحبة في سبيل الاحتمال
وانتي تعيشين عمرك تفرحين وتجرحين

من غرورك في جمالك ما عطيتيني مجال
وأدري إنك تفهميني لو بغيتي تفهمين

كيف أشوف الشمس تشرق بالسما وانت ظلال ؟
ومن يعيش بوسط غارٍ للذياب الجايعين ؟

كنت أحسب الكره زايل والجفا لو طال زال
ولا بديتي بالغرام ولا بقى فيني حنين

أشهد إني ما خطيت ولا نويت الانعزال
وما خدعتك في غرامي لين شفتك تخدعين

اصدقي بالوعد مرة لي ولو فيها سؤال
من عرفتك ما أذكر إنك توعدين وتصدقين

كنت أشوفك من عيونك تأمرين أقوى الرجال
والله إني قبل أعرفك ما هقيتك تخضعين

كنت أشوفك تبعدين وقلت من باب الدلال
وإن بعدتي عن عيوني قلت باكر ترجعين

كنتي أكثر في عيوني من عدد وبل الخيال
وين أنا ما الد وجهي كنت أشوفك تضحكين

وإن بغيت أصد عنك من يمين ومن شمال
ما قوت عيني تلفّت لا شمال ولا يمين

عاشقٍ والعشق بلوى وأشهد إن الحال حال
ولا تركتي رحمة الله ولا عرفتي ترحمين

وأدري إنك في غرامي للأسف نلتي منال
افترقنا في دقايق والسبب لعنة لعين

حبك أشبه في غرامي بالوصال الانفصال
ويلعب الخفاق لعبة كبرياء الخاضعين

بالهوى ماهي غريبة نكبة عيال الحلال
ولاني أول من يصون ولا انتي آخر من يهين

الصداقة في عيون الناس منفى للعدال
وكان ردّت للصراحة كلبونا مذنبين

المحبة شبه زالت والصداقة لاتزال
بس أببقى في عيونك ( حامد ) اللي تعرفين

علّميها يا قصيدة واضربي فيني مثال
عرفيها بالبداوة في طباع الأولين

علّميها كيف نصنع صبرنا والاحتمال
علّميها كيف نفلح بالعمل دنيا ودين

علّميها في سوالف حلّنا والارتحال
علّميها كيف نظهر جورنا للجايرين

علّميها يا دقايق ، علّميها يا ليال
علّميها يا عصور وعلّميها يا سنين

إن عشقنا ما بغينا غير عشقٍ بالحلال
وإن نوينا ما لفينا كود ناس طيبين

كاملينٍ في عطانا بس لله الكمال
والرجل فينا غرامه لو يعين ويستعين

ابدويٍ ما يقوده للردّى شد الحبال
يعسف اليدّ الشحيحة للعطا حتى تلين

همنا فعل الرجولة رمزنا لبس العقال
وانتي المكياج كله صار في وجهك سجين

عندك المكياج موضة تحسبين إنه جمال
صار همك في حياتك تكشخين وتطلعين

والا أنا قلبي بقى لي بالمحبة راس مال
والله اللي مبتليني بالهوى والله يعين

إن بغيت أعشق أبالقى كثر حبّات الرمال
لكن انتي لو بغيتي صعب مثلي تعشقين

قلت لك كل الصراحة وأختم أطراف الجدال
وإن زعلتي من كلامي تزعلين وتقعدين

القصيده :المباني

جابك الله من غياب ٍ ضيّق صدور المباني
قبل لا الوحشه تزعزع بيتك الصلب وتبيده
بيتك اللي من رحلت وكل جدرانه تعاني
ماتحمل ينتظر شهرين وعيونك بعيده
الله العالم لو إنك جيت متأخر ثواني
ماتشوف إلا بقايا من حصاه ومن حديده
من عرفتك وأنت تايه من مواني لي مواني
وتارك ٍ قلبي مولّع من وقيده في وقيده
ضاعت سنيني أحد بهاليالي وتحداني
وأنت ماتشبع غياب ولاتخاف من النقيده
ودي أتحمد لك الله بالسلامه , مامداني
كل ماتوصل برحله ترجع برحله جديده
دام تدري كل وجه ٍ غير وجه الله فاني
ياخي أكسبلك ثواب وخاف ربك في عبيده
كان فيني عيب قلي:فيني العيب الفلاني
كان هرجي مزعلك في شي قلي:لاتعيده
عيب تصغر في عيوني وأنت برقاب الغواني
كيف تستسهل طعوني وأنت خابرني وليده ؟
لعنبوك أن مت بيدك من يفكك من أخواني ؟
لحزنوا ربعي على فرقاي شاللي تستفيده ؟
أنت منت اللي عشقته أنت أكيد انسان ثاني
ليه صرت بهالبرود وبهالاحاسيس البليده ؟
وين حبك للزعل .وين العناد الأولاني ؟
وين حنّية زمان وفرحة العمر الرغيده ؟
وين ذاك اللي اليا أقبل مايبات إلا بمأني ؟
وين راح اللي اليا أقفى مايروح ألا فقيده ؟
واحد ٍ من جابه الله بس يامر ويعصاني
الوحيد اللي أخافه غصب وأمشي معه سيده
(مابغيت أطيح بيده) لين ماربي بلاني
ولا أنا لو هي بكيفي (مابغيت أطيح بيده)
ذاك بس اللي يامن جيته يلخبط كياني
اللي بنظره ينشف دم قلبي في وريده
قبل أشوفه أجمع اله أحلى القصايد والمعاني
وأن لقيته ماعرفت أقول لي جمله مفيده
الف مره قبله أعد القصيده من لساني
ولعنبوه أن جيت عنده قمت أخربط بالقصيده
أمدحه وأنا أدري أنه لو تباطاني نساني
أنطحه وانا أعرفه مجنون وأفكاره عنيده
من يسوي بي سواتك يالرهيف الاسمراني ؟
منهو من الناس غيرك غلطته ترفع رصيده ؟
من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟
ان تبعتك .أتبعك من طيبي وواسع بطاني
ولا أنا لاجيت أكيد انسان عزالله بكيده
أقدر أنزع لك ثيابي وألبس ثياب الأناني
وأقدر أطلع من عذابي والعب بدورك وأجيده
ومستعد أكسب رهاني لو بغيت أكسب رهاني
وأخدعك بحساس كاذب وأتحدى من يصيده
أبك أنا لي شفت خلّي حط غيري في مكاني
والله إني لتركه وأن صد لعشق سيد سيده
جيت مابيك تحقرني جيت أبيك تعز شاني
جيت أبي فزعة ظلوعك من مشاعرك البليده
خلني داخل (حدودك) وأجبر بخاطر زماني
أكذب بباقي (وعودك) وأصدق بلحظه سعيده
أنتشلني من (برودك) لو تولّع بالمحاني
عطني أحساس (بوجودك) وأخذ كل اللي تريد
تكفى واليا قلت :تكفى بيع خلق الله عشاني
لاتضيّع من يديني فرصة العمر الوحيده
يعلم الله شفت منك ومن غيابك ماكفاني
كان ماتقدر تخفف هم قلبي !! لاتزيده
شف غيابك وش يسوي بالصدور وبالمباني
وأنت تدري كيف كانت صدمت غيابك شديده
والله أنك لو وصلت البيت متأخر ثواني
مالقيت إلا بقايا من حصاه ومن حديده

القصيده :حد علمي

حد علمي بالغلا يوم كنت أسوى كثير
يوم كانت ضحكتي طبع وعنادي سمه



وحد علمي بالغلا يوم خفاقي ضرير
قبل أهدم العشق وأبنيه وأرجع وهدمه



وحد علمي بالبكاء يوم لي قلب وضمير
قبل أشوف المسلم يموت بيد المسلمه



إيه عدّت من يدي بس ماعدّت بخير
ليلةٍ عيّت تجيني وجتني مظلمه



من عرفت إحساسها كن في قلبي نذير
والنهار المكتئب باين ٍ من مقدمه



ليلةٍ حسيتها لاتجور ولاتجير
مثل طفل ٍ ماحقرته وعيّت إحشمه



وأصبحت مثل شعره وأقصمت ظهر البعير
وأبتدى في موته الجرح من حيث إختمه



صارلي بالعشق مالا هقيت أنه يصير
أنظلمت بعشرت أنسان ماكنت إظلمه



العشير اللي تبرى من ضلوع العشير
الحلا عزّز خطاياه والحظ إخدمه



لاتبسّم يكسر النور بعيون البصير
وكن شمس المغربيه تبات إبمبسمه



معتدل في قامته لاطويل ولا قصير
ممتلي بالزين من معصمه لي معصمه



فيه بلوان الهدب لون غير ولون غير
مثل ما للرمش بالعين قصه مبهمه



كنها نكس البيارق على شط وغدير
ومثل لملمت الشتات بشتات اللملمه



مع سواد مجدّل ٍ مايثور إلا يثير
كنه اللي ينهم الريح ثم ٍ تنهمه



ماتجمع لين قيّد حرير ٍ مع حرير
في ضلام ٍ علّم الليل مالم يعلمه



ماهقيت إن الهدب صلف وأجفانه تغير
لين سلهم لعنبوا جد ذيك السلّهمه



ماعتقني لين ساق البشاير للبشير
يوم صد وجاه قلبي بشحمه ولحمه



والله إنه حط قلبي تحت رحمت شطير
في يديه وكل ماراد يقسمه قسمه



ياعساني ماعدم إرضاه في برد وهجير
ولوعدمت مروّته ياعساني معدمه



إن طلب عيني رضا قلت ماغيره نظير
وأنشرب دمي غضب قلت يستاهل فمه



واهنيّه يرقد الليل مرقاد الغرير
كن نومه لابغى يهزم الجفن إهزمه



وإلنا من صفرة عصير الى صفرة عصير
والسّهر يايلزم العين وإلا تلزمه



لو صحيح إن الحبيبين يجمعه مصير
كان نفس اللي حرمني من النوم إحرمه



والله إن مروّتي ولّعت فيني سعير
يوم شفته تل قلبي وداسه بقدمه



مارحم زهرة شبابي وأنا توّي صغير
لين ضيّق خاطري ضيّق الله إنسمه


إيه عدّت من يدي بس ماعدّت بخير
ليلةٍ عيّت تجي بس جتني مضلمه



حد علمي في عناها عذاب وزمهرير
يوم قمت أوحي بالاضلاع صوت وهمهمه



وحد علمي بالرجا من نصير اليا نصير
يوم شفت النّفس تذبح وهي مستسلمه



وحد علمي بالبكا يوم لي قلب وضمير
قبل أشوف المسلم يموت بيد المسلمه

القصيده :ثامن السبع العجايب

اسمعي والكل منا له هواه وله ميوله
لاتمسين بكلامك شعره بروس القرايب



ان حكيتي ما وفيت وان تحديتي عجوله
تحسبين ان كل فعل ٍ تفعله يمناك صايب



تحسبين انك خذيتي بالحش صولة وجولة
تحسبين اني ذكرتك مع نسانيس الهبايب



والله انك لو ذبحتي خافقي لألقاك حوله
عاشقة تشقي بقلب من طريق العشق هايب



كم رضيت اسكت عليك من القهر وانتي زعوله
خايف اضحك وستفزك واهجرك واعيش ذايب



ادعيت انك خجولة وادري ان ما انتي خجولة
وادري انك تخجلين الشمس من فوق السحايب



مايحببني بقلبك ياالهنوف الا فضوله
ولا ينسيني غرامك غير تكرار المصايب



عاشقة جيتي ورحتي يالحبيبه يالعذوله
لابنيتي لي طموح ولا تركتيها خرايب



تستبيحين القلوب وتستحقين البطولة
واستحق اعيش بعدك تايب واموت تايب



ياكثر ماشال قلبي شي اكبر من حموله
ولا عفيتي عن غلاه ولابخل لك بالوهايب



كنه ارحم من همال المزن للزهر بذبوله
وانتي اقسى من هجير القيظ وسموم اللهايب



وانتي ادرى في غلاك بداخلي ش اللي يزوله
وادخلي على الله واحفظي ذيك السبايب



ماخبرت اللحظة اللي حللت قربك تحوله
ولا هقيت اني بشدد للجفا قلب وركايب



ولاهقيت انك تحبين الزلل وانتي جفوله
ولاهقيتك تكرهيني كثر حبك للطلايب



كن قلبي في وصالك وابل ٍلحظة نزوله
وفي فراقك مثل دمعة تنحدر من عين شايب



كنت ابي وقفت حبيبه تنهض القلب بخموله
طامح بالعشق وانتي عايبه والحظ عايب



كنت ابيع الكون واشتري خافقك وظلال زوله
كنت اثور اليا وطيتي بالقدم شهب الترايب



كنت قصن كل كفي غير كفك مايطوله
كنت قلب ودمعتين ودرب وجروح عطايب



كنت ابيع العمر كله ورخصه عرضه وطوله
للعيون الي هدبها ثامن السبع العجايب



بس ابرضي لك غرورك واكسر القلب بذهوله
وقتها ماكنت افكر صايب او كنت خايب



والرجل لو ماتحلى بالشهامه والرجولة
صدقيني صعب يقدر يملك قلوب الحبايب



صدقيني مايوالف خافق البنت بسهوله
بالهوى يابنت حواء غير طلاب النشايب



والسهر والعشق الاول والهوى واللي ينوله
شي اقسى من همومك والعنه حاضر وغايب



والهموم اللي دعتني من بعد سن الطفولة
كلها ( من تحت راس العشق ) ملعون الصلايب

القصيده :الشعــــراء

مابقى الا سود الايام تحرمك الرقاد
كيف الاوهام اتجرأ اتسريك مغبون



من متى تجزع من الدمع وتخاف البعاد؟
من متى تقفي بك ظنون وتجيبك ظنون؟




صرت تاخذ كذبتي صدق، ومزاحي وكاد
لو بقول اني بخونك تحسب اني بخون




ماتعرف ان كل شاعر يهيم بكل واد؟
وانهم دايم يقولون مالا يفعلون؟



ابك انا لاقلت ابنساك وانكرت الوداد
والله اني مانسيتك وولاهم يحزنون




من جزع من صفعة الشمس يطمع بالبراد
ومن فقد وجهاته الخمس يلقى بك ركون




اعتبرها هفوة انسان او كبوة جواد
لو بتسمح فانت غالي ولو تجرح تمون




عد صداتك مروة وطعناتك ضماد
خلهن لاراحن طعون ولا ردن طعون




خنجرك يستاهل الطعن ومتوني شداد
ومنك يازين الخناجر ويا بخت المتون




ردلي حنية المزح باحساس الجماد
خلنا واحد يجي صلب والثاني حنون




موت فيني واندفن فيك بثياب الحداد
وان حييت أموت لرضاك واحيا بك بهون




مره ارقد بالكفن وانت ترقد بالمهاد
ومرة ارقد بالمهد وانت ترقد بالكفون




ادري ان شجونك شجون واعنادك عناد
والبلا ان عنادك عناد وشجونك شجون




ربك اللي سخرك لي تقود وما تقاد
والله الخالق ولله في خلقه شؤون




ازرع ضلوعي من رضاك وابشر بالحصاد
لعنبو من جيت ترضيه وترد امحزون




بس تسوالك بلد ؟ قول تسوالك بلاد
انت كل العالم بكون ولحالك بكون




مابعد محبتك حب ومرادك مراد
غير كونك سيد حشاي تدري من تكون ؟




نعمتين اختصوا الخلق من جود الجواد
كافل الأرزاق من حيث مالا تعلمون




البنون ونعمة المال بعيون العباد
زينة الدنيا بلا شك في كل العيون




مثل زينة دنيتي بس عندي شي زاد
من عرفتك صاروا المال وانت والبنون




انتشي بك نشوة التيه لعناق الرشاد
وافزع الك فزعة القرم لشهاب الزبون




واحصنك تحصين الأرزاق عن درب الفساد
واعشقك عشق المظاليم لفراق السجون




لو تزيد الشوق جمرة تحولني رماد
لو يزيد العشق شعرة بوصل للجنون




خل هقواتك كبيرة ونظراتك بعاد
كانك انت بكبرك تهون من اللي ما يهون ؟




ازعلك وارهن حياتي تحت رحمة زناد
تهبى لا والله الا انت والموت تهبون




عاد اذا ما ارضاك هرجي ولا اللي قلت فاد
اننا لله وانا اليه راجعون




وانت باكر بتعرف على ناس جداد
والكلام يجيك من كل شكل وكل لون




لاتحسب ان كل كلمة بتسمعها وكاد
ولا تصدق هرج شاعر وتخدعك الظنون




دايم اعرف كل شاعر يهيم بكل واد
وان هم دايم يقولون ما لا يفعلون




حتى انا اللي قلت اعشقك وما اطيق البعاد
يمكن اطلع ماعشقتك .. ولا هم يحزنون

القصيده :غرام أحباب

على ذاك الطريق اللي يسمونه غرام أحباب
وطت رجلي على دربه ولاأدري وش نوى فيني


تبعته لآخر دروبه .. ألين أن القمر قد غاب
تعب قلبي ، ولا تعبت مسافاتٍ توديني


لقيت الليلة الجردا : هدب ظل وسما واعشاب
بعد ذاك الظلام اللي يتوهني عناويني


صدفتك معجبه فيني وياليت..الغرام : اعجاب
وتراك انتي الهنوف اللي هقيتك تستحقيني


عطيتك عشق من قلبي..وسلمت لغلاك رقاب
وغيرك يحترق قلبه ولا يقدر يحاكيني


أنا قبلك صدفت عيون لكن ويش جاب لجاب؟
ترى كل العيون اللي لقتني ما تكفيني


رماني حظي العاثر عليك وجيت لك طلاب
ولا أنتي اللي عشقتيني ولا انتي اللي عتقتيني


تعالي واعتقي ذاك الخفوق المولع المرتاب
مهب لاجلي ، عشان الله يجازيك ويجازيني


تعدي في سما عشقي ولو عشقي خراب أصحاب
وصوني بالهوى نفسك قبل لا انتي تصونيني


وشيليني على متنك : خفوقٍ باريٍ منصاب
ومن فوق الغرام العذب .. شيليني وحطيني


ولا منك هقيتيني شجاع وما يطيق يهاب
أنا لك بالهوى والله مثل ما انتي هقيتيني


أنا ما أمشي ورا غيرك ولو أنه يطق الباب
وترى عيبٍ عليّ أطعن..ولو كثرت سكاكيني


زهودٍ ما يطيق الدم لا داين ولا طلاب
شجاع وعارفٍ نفسي وأظن أنك تعرفيني


غيورٍ ماعرفت أضحك مع الغدر ببّرود أعصاب
أبيع عيوني الثنتين قبل أنك تخونيني


إذا شد الغرام .. اترك خفوقي : بين ناب وناب
لفرقى تكسر ضلوعي .. ولا عشقٍ يوطّيني


أنا رجلٍ ولي غيره .. وإذا شفت الهوى كذاب
تثور بقلبي الفزعه ولا تهدى شياطيني


سؤالك لو يزعزع بي كياني ما قبلت عتاب
اجي لك وأسالك نفس السؤال اللي سألتيني


عن العشق القديم أبواب .. تقفيها كثير أبواب
بعد ذاك الحبيب اللي خدعني وانخدع فيني


أبي عشق تحسب له كل نظرات العيون حساب
وابي قلبٍ علي قلبي ، وابى دينٍ على ديني


وابي نظرة عطا توفي ولا تخلف بدون أسباب
وابي منك قبل لا نتي تصديني .. توديني


وابي دربٍ على العذال صعبٍ ومتعبٍ وغلاب
وابي نفس الطريق الصعب يبعدهم ويدنيني


ترى لو للقلوب عيون ولدموع العيون أهداب
حشى ما تنزل الدمعه لغيرك لو تركتيني


أنا أول من عرف قدرك وأنا توي صغير وشاب
وابي منك ما دام أنك عرفتيني تحبيني


ما دام أني لقيتك في طريق أسمه غرام أحباب
دخيل الله ، وبعد الله دخيلك .. لا تخليني


ما دام أن كل من يحيا على وجه التراب تراب
عسى تنساني الدنيا مادام أنتي ذكرتيني

القصيده :رد السؤال

انتبهت لدمعها بالهدب والكحل سال
لين جفت عينها دمع والقاع ارتوى



وابتدت لحضة جفا ونتهت لحضة وصال
وأنطفى نور السعادة واحسب انه ضوى



ما اكتفيت من الهوى والغرام أربع ليال
واقفت أيام التلاقي وجا وقت النوى



كنت ابلسى وابتسم والتفت عنها شمال
لا قويت الصد عنها ولا قلبي قوى



ما هقيت ان الهوى عذب قلوب الرجال
لين ضاع القلب مني وتفكيري سوى



رحت أدور دفوة الشمس ضيعت الضلال
جيت اطفي شعلة النار والقلب انكوى



ماهقيت ان السعادة خيال في خيال
تروى قلوب الحبايب وقلبي ما روى



كنت ابشتال الهوى والهوى ثقل الجبال
وان تحملت الجبل ما تحملت الهوى



كنت ابسلى بالهوى والهوى صعب المنال
ما رضا لي حظي اللي طواني وانطوى



قلت لا فراحي تعالي ولا قالت تعال
والخفوق ان قلت ابقبل على صدي نوى



الله أكبر لا شرقت شمس يتلاها زوال
كيف ابفرح في صباح مع الليال استوى؟



لاحصل بالحب قسمة ولا جا لي مجال
غير اشوف معاند الجرح وعناد الدوى



شبت النيران واقفت وجاء رد السؤال
ما تشب النار يا كود يوصلها هوا

القصيده :من تحت لتحت

لو تعرف الخطايا كيف كنت محروم
كان سود الليالي يوم طحت سمحت
لو هموم المفارق مثل كل الهموم
ماتشوفون عيني بالدموع سبحت
ولو تحن المشاكل عقب حب الخشوم
كان حبيت خشم المشكله واستحت
بين صدة عزيز وكبرياء مهزوم
عين شحت على وعينٍ استسمحت
بس مالله خلقني من بكاي معصوم
وادري انه المحاجر لو تفيض افضحت
والله اني على جرحي صبور وكتوم
لكن ان الدموع ان روحت روحت
اعذلتني ظروفي وانهكتني عزوم
والوجيه احزنت لي والقلوب افرحت
اشهد ان الليالي ماتعرف السلوم
قلب جافي لقاه ووجه صافي بحت
راهنتني تبلل بالدموع الكموم
ويشهد الله عليها راهنت واربحت
احرمت نور عيني من غلا ريم قوم
بذرةٍ وارتوتني واثمرت واطرحت
جادلٍ دوم ماهي مثلها كل يوم
استضاحت غموض وبالغموض اوضحت
دورت بين قلبي والهدب درب نوم
وامرحت وين مدري المهم امرحت
تنحت اسمي بقلبٍ جيت فيه معزوم
واسمها بين جلدي والعظام انحت
مثل جفني لعيني بالنعاس محكوم
كل مانمت نامت كل ماصحى صحت
ماتعارض كلامي غير عند اللزوم
بس لا قمت اسولف واندمجت سرحت
دايم ازعل عليها بس قلبي رحوم
وهي تموت بعذابي من تحت لي تحت
مثل وجه العلاقه في ثياب الخصوم
ان تطيبت طابت وان جرحت اجرحت
خصها الله بوصفٍ من خيال معدوم
لا اذان اسمعتبه ولاعيون المحت
كن ربي خلقها من بياض الغيوم
ومن كفوف السحابه بالورد القحت
عن سواها فرقها بالقمر والنجوم
وكل عذرى تباها بالجمال انزحت
بالحلا هي كوم وباقي الناس كوم
كفتٍ عادلوها بالبشر وارجحت
حسبي الله على اللي مابغاها تدوم
من بعد كيف كانت شوف كيف اصبحت
لاتحقق وصال ولا فراق محتوم
خطةٍ قربتني للفشل وانجحت
لعنة العشق تبقى مثل ضرب السهوم
لو محى الوقت جرحه صورته ما انمحت
كيف ابنسى وانا اللي من جفاف لسموم
ماحشمت العيون ولا الدموع فلحت
كانها بالحميا كل ربعي قروم
لو يلدون لاصعاب الظروف صلحت
اجزم ان كنت ياقلبي شجاع وجزوم
لد لعيون بنتٍ لا التفت الفحت
ماتهين البخيل الا يدين الخدوم
دام كف الخطايا بالجفا لوحت
نطح الباس باس ونطح اللوم لوم
وان تهدت تهد وصيح ان صيحت
ياتعيش بمعزه ياتموت محشوم
ودك ان الليالي لافعلت امدحت
عمر ضعف الاراده مايسر الرخوم
ضربت السيف لوبيدين الشجاع ذبحت

القصيده :قالها حامد

تماديتي وأنا مثلك تماديت بهجر وبعاد
وكلٍ مثّل عناده خفوقٍ ثابتٍ صامد
وإذا عندك بعادي عيد ترى عندي جفاك أعياد
وعسى طول الجفا مني يليّن قلبك الجامد
أبضحك وأظهر البسمة ولو إن الجروح اجداد
وترى قلب الحريقة ضو ولو وجه الحطب رامد
بكون أكبر من الغلطة وبعلن للهوا ميلاد
إذا كان الخطا منك مجرّد ثورة الخامد
وإذا كان الجفا منّك مسافات وغلا وعناد
تراي أكبر من عنادك وقولي قالها حامد

القصيده :وش اللي يجبر الشاعر

انا والليل والعبرة وجرح وخاطر ٍمكسور
ونفس من هجير البعد والحرمان مقهورة وقلب ظامي لشوفك ولايروى ظماه بحور
وعين تحتري لحظة غياب الطيف وحظوره

ونار تنطفي مره ومره تشتعل وتثور
واقول النار مقدورة وهي ما هيب مقدورة

حسبت الليل بغيابك يمرن الليال دهور
وكني شايل بقلبي ليال الوقت وشهوره
تصبرت وتقدرت وبنيت من الخيال قصور
إلين ان الجفا شد الركايب وانتهى دوره

تحريتك على درب القصيد من ثلاث شهور
وحشا ما مات لك غصن يشف الماي بجذوره

تخيرت الغرام وجيت لا راضي ولا مجبور
وجيتي تسبقين خطاك مرضيه ومجبوره

وانا ما كان لي رغبه أبين واكشف المستور
ولكن الجمال أكبر من الخفاق وشعوره

جمال وود وعيون ودلال وكبرياء شعور
وفتنة تخذل عيون النهار وينطفي نوره

ولك في خافقي صوره تلاشت بين ضي ونور
وأخاف اسكت من الفرحة وتنطق باسمك الصورة

عرفتك وانتهت رحلة قساوة دربي المهجور
والا يا جملة أيام الجفا والصد مشكورة

خذتني للجفا عزه واخذني للعناد غرور
واخاف اكون بعنادى حبيب ومات بغروره

وإذا كانت مسافات الخيانة للغرام قبور
وش اللي يجبر العاشق يخون ويحفر قبوره؟

وش اللي يجبر الشاعر يدور للشعر جمهور؟
مدام انتي محبينه وعشاقه وجمهوره

القصيده :هموم بهموم

من يوم فرقانا الى يومنا اليوم
مافات يوم الا وهي مشغلتني
إليا غفيت اشوفها في حلا النوم
واليا صحيت بكل الافكار جتني
عشقتها من قلب ميس ومحروم
وتركتها يوم انها عاندتني
نار تشب بداخل القلب بسموم
حاولت اطفي ضوها واحرقتني
دنيا ثقيلة كلها هموم بهموم
كني حملت جبالها فوق متني

القصيده :التمثال

عفا الله عن خطا غدر الخناجر والضلوع ابطال
بسامح واتركك تحت الظلام الحالك لحالك



دخيلك وفر دموعك ترى هدر الدموع اذلال
وترى ما فيه أحد يصبر مثل صبري بغربالك



انا عيب علي أنقض كلامي والرجال افعال
واذا قلت اقطع احبالك تراني بقطع حبالك



عشان اكسب هدب عينك تجرعت العذاب اشكال
وليتك ترأف بحالي علشان ارأف بحالك



مسوي في حياتي شي ما يذكر ولا ينقال
حشا حتى العدو وهو العدو ما يعمل اعمالك



تمسيني على الهم وتصبحني على الغربال
تقلطني فناجيلك وتقصر عني دلالك



تحملت التعب لجلك وانا حملي يهد جبال
رحلت من العذاب وما وقفت الا على جالك



علامك كل ما جيك متواضع جيتني تختال؟
معاك اليا متي بصبر وصبري معك يحلالك؟



مثل ما اقبلت لعيونك لزوم تلد لي باقبال
ومثل ما قد حشمتك حس واحشم قلبي اشوى لك



أنا محدن بجابرني أساير معك هالمنوال
ترى لاني تبيع لك ولا ني باصغر عيالك



أنا جيت اعشقك نبض ومشاعر ما اعشقك (تمثال)
أنا جيت اسكنك واحياك وابقى فيك وابقى لك



أنا جيت بظما عاشق تعب يطرد سراب اللال
أنا جيت استفز رضاك من فرقاك والجا لك



أنا ما همت بك عاقل أنا كنت اعشقك بخبال
أنا ما كنت احبك حي أنا كنت اعشقك هالك



تخيل من كثر ما اخاف تلقى للزعل مدخال
أخاف اخطي على طيفك وادوس برجلي ظلالك



تبعتك والعرب تتبع رعود البارق الهمال
وانا شفت المطر يتبعك في حلك وترحالك



كأن اللي خلق حسنك خلقني مع جسدك ظلال
وصرت اقرب جسد يمشي معك باقفاك واقبالك



أبي قلبك يحس انه فقد بمحبته رجال
ملكته من هدب عين وخسرت رضاه باهمالك



صحيح ان الفراق اقسى ولكن الوصال محال
أنا صعبن علي أرضي غرورك واضعف قبالك



بعد ما حققت عيني فبعدك للرقاد امال
أعود للسهر؟ -- يا خوي فال الله ولا فالك!



ببدل نظرتك فيني واجي لك كل يوم بحال
بكون اقرب من ثيابك عليك ولا تهيا لك



بلمك وانثرك واجمعك وارجع وانثرك باهمال
بخونك وازعلك وارضيك وازعل منك وارضى لك



أبرسم بالثرى وجهك وابدفن صورتك برمال
أبشكي للعرب فرقاك واضحك عند عذالك



أبهديك الوصال فراق واهديك الفراق وصال
بسوي مثل ما شوفك تسوي وافعل افعالك



عشان تعرف من فينا الزعول ومن وسيع البال
أبيك تذوق فنجالي وانا بذوق فنجالك



نصيحة واحتفظ فيها قصر معك الزمن أو طال
أبي تسمع كلامي زين وتحطه على بالك



اذا حبك هبال اطفال لك عندي هبال اطفال
ولا --- وابشر بعد بهبال حب ٍ ما هو بهبالك



واذا قصدك تهين اسمي عشان تشمت العذال
ترى لا انته ولا غيرك --- ولا عشرة من اشكالك

القصيده :االذيب والراعي

انا قلبي على الفرقا نوى روحه بدون رجوع
مثل طير بلا سبق وبلا وكر وبلا راعي



تهيا للجفا خطوة يبي بقصى الطريق هجوع
يدور للعنا ملجا طريق قلوب جزاعي



فديتك يالخفوق بحب وجرح وقطرتين دموع
قبل لايجبرك خلك على وتلوي ذراعي



تعنيت وسبقت الوقت ولا عشت الغرام اسبوع
انا مابي من الدنيا هبوب تطرح شراعي



لعبت بدوري العاشق وكنت التابع المتبوع
وتلعب عيني ادوار الرسالة في يد الساعي



رقيت الحب من ساسه الى راسه ولع وخضوع
ورجل ٍتصعد الهامه ورجل ٍتحتضن قاعي



عرفت ان الهوى ظالم مثل ظلم العطش والجوع
وأظني يوم انا عاشق شبيه الغافي الواعي



غفيت بعشقي الخاين ووعيت بعمري المدفوع
واشوف القلب لأيامي غدا ناعي وأنا ناعي



وانا بقبل على الفرقا وبضوي للظلام شموع
ولا لي بالشقا حاجه ولا به للسفر داعي



وببدي رحلة الفرقا وبأرحل وانهي الموضوع
مادام ان العذول اللي لبس ثوبي مع قناعي



ابعرف ياترى بعدي من اللي يقطف المزروع
وانا مالي بهاالدنيا سوى خلي ومرباعي



سطا ذيب على المرعي وسلمت بخافق مفزوع
وفدوة لو يموتن القطيع ويسلم الراعي

القصيده :يجيني يوم وعطيها

انا ما اخطيت في حقك ولكن الكلام عتاب
أعاتب والعتب كلمة تفسرها معانيها
اعاتب واحسب بهرجي الا مني حكيت حساب
وكلمه يستحي منها لساني يبتدى فيها
واذا انت من العتب تزعل علينا وابتصك الباب
ترى ما نيب قاصدها ولاني فيك ناويها
ولا ودى على الفرقا وقلبي داخلي مرتاب
اشوف ان الهوى خدعة واشوف القلب راضيها
واشوف ان الهوى فرقا مواليف وعناد احباب
واشوف ان الجفا خطوة ولاني قادر اخطيها
وقلبي لو عشق يخلص ولو طالت عليه رقاب
وتشهد له دروب الحب حاضرها وماضيها
عشقنا والهوى حسرة،مشينا ولاأمل كذاب
بدينا نانبني منها قليل من بلاويها
عرفت الحب من عمري صغير بالغرام وشاب
وقلبي للحبيب اكبر من الدنيا وما فيها
صحيح انى نويت ابعد ولكن الهوى غلاب
وهي رحلة بديت بها ولا ادري كيف بنهيها
تحريتك شروق الشمس وشفتك للشروق غياب
ولا اضنك تبيع العشره اللي كنت شاريها
بقى لي بالهوى نظرة وتغريبة ودمع اهداب
وقصة بترك لسانك على العذال يرويها
واناجي باقي حروفي وبألف للفراق كتاب
قصايد تملي اوراقي ارددها واغنيها
واذا مرتني الذكرى وجرحي بالحشا ما طاب
بتبعدني وتدنيني وببعدها وابدنيها
وانا عيب علي اشكي من الدنيا بدون اسباب
مدامي ما خذ منها يجيني يوم واعطيها

القصيده :الجريمة

يوم ثارت في جنون من جنون الجاهليه
عاتبتني لين شبت في شراييني لهبها
واستفزتني وفزت وزعلت مني عليه
وستضاقت من كلامي يوم زعلني عتبها



من بعدها ما بقى لي في محانيها بقيه
اسدلت دمع المحاجر للبكا ورخت هدبها



والله اني مانويت ابدي معاها بالخطيه
بس هي اللي تعدت حدها لحظة غضبها



والله اني كنت اكابر بالعتب بحسن نيه
بس ابدري هو صحيح اني الوحيد اللي عجبها



يمكن اني كنت قاسي بالعتب معها شوية
كثر ما كانت تمنى راحتي واعشق تعبها



جرحتني بالكلام وكبرت حيل القضية
واخسرت بي كل عرق من شراييني كسبها



ولا هي ماكان فيها للموادع مقدرية
والجفا كانت تعافه بس مدري وش قلبها



ليتني مارحت اقياس قيمتي عند بدوية
رجعت لي كل عرق حبها ولا نهبها



وعلمتني كيف بالجفا وانتصر وابقى ضحيه
وعلمتني كيف قلبي لو غلبها ما غلبها



وعلمتني يوم صدت عنفوان الاجودية
ماتلوح للمقفي لو سلبها ما سلبها



رابية بين القبايل والعرب واهل الحمية
عاقله ماتبذر إلا نخلة تعرف رطبها



إن تهادت ذكرتني في خفوق العامريه
وإن تمادت تركب ابليس الرجيم وماركبها



جفنها لا سلهمت به ما يطليق السامرية
تسحبه برضاه عينه وان سهت عينه سحبها



وان حكت تعطي مكانه للحروف الابجدية
كن كلمتها تلفت للكلام اللي عقبها



والحروف اليا تعدت بالشفاه النرجسية
كنها صارت قصيدة بس ربي ماكتبها



وش بوصف من حلاها وش بخلي للبرية
مابها بالحسن عيب واكشفته الا حجبها



شعرها فيه الخوي اللي تبرى من خويه
والشفا لو تشرب الما واختلط فيها شربها



كن في ضمة شفاها جمرتين بنار حيه
كل من حس بدفاها وحترق صد وقربها



شفتها مثل الجريمه وابتليت ابها بليه
غلطة ٍجيت اتحاشى ظلمها قلت ارتكبها



كل شي شفت فيها فيه نبره جاذبيه
موهبة من فضل ربي واشهد ان الله وهبها



كلها لله بلله فاتنه ها لآدميه
عاجبتني من بداية راسها لا سفل كعبها



لو تبادلني شعوري والهدية بالهدية
ماوفت لي لو تبيع ثيابها واغلى ذهبها



هملتني والقلوب الجرهدية جرهدية
وحرقتني والمحبه نارها تاكل حطبها



ولا انا ماكنت اكابر والليالي السرمدية
يمكن ان اللي غصبني للولع فيها غصبها



ياخوفوقي وادري انك منت في حاجة وصية
شف مكاني وانت تدري وين هي يمة عربها



رح لها وان كان فيها قلب يطمح في مجيه
شف طلبها في عروقه وان حصل تمم طلبها



وانشده وان قال عنها من هدر دمي بريه
قله ان اللي حصلي بالمحبة من سببها



ولو يقول اني تعمدت الخطا لجل الأذية
قله اني ما تحمل بالعتب قله ادبها



ولو يقول اني انا اللي كنت بادي بالخطية
قل هي اللي تعدت حدها لحظة غضبها